N G Gemeente Deneysville - 28 Augustus 2011

PSALM 111

Hierdie is 'n lof psalm. (111 – 118)

Ons kan die psalm onderverdeel in vers 1 – 7a: Die Here se karaktertrekke word uitgebeeld; en vers 7b tot 10: Die Here se voorskrifte is betroubaar.

As ek die twee dele kan saam trek in 1 dan sal dit wees: Die Here is betroubaar. Jy hoef nooit ooit een oomblik aan Hom te twyfel nie.

Iewers het ek gelees wat die verskil is tussen kennis en wysheid. Kennis is om te weet 'n tamatie is 'n vrug. Wysheid is om te weet dat jy liewers nie 'n tamatie in jou vrugteslaai moet insny nie.

Vir ons vanoggend is daar 'n meer ernstige verskil tussen kennis en wysheid.

Ons het vandag klemverskille in die woord “ken”. Bv As jy my vra of ek Pierre Spies ken, dan sal ek dalk sê “ja.” Ek het persoonlik sy pa geken. Ons het kontak verloor. Eerste ding wat ek hoor is dis sy seun wat rugby speel. Ek weet sy oupa was 'n AGS pastoor. Ek was al by sy oupa se huis. En ek het 'n keer of twee saam met sy pa in sy VW kewer gery.

Ken Pierre Spies jnr my? Nee. Hy weet nie ek bestaan nie. En nee, my kennis van Pierre jnr is maar wat ek lees in die koerante. So, eintlik weet ek net van hom. Ek hou van wat ek sien en hoor. Maar eintlik weet ek net van hom.

Die ander verstaan van ken is soos as ek vir jou sê ek ken my kinders. Dan weet ek nie net 'n klomp goed van hulle nie maar ons is amper daagliks in gesprek met mekaar.

Die verskil tussen kennis en wysheid is dan dit: Ken jy God? Glo jy in Hom? Volgens Jakobus glo die duiwel ook in God en hy sidder en beef van angs.

Dit is een ding om kennis van die Here te hê maar dis 'n ander ding om die Here werklik te ken. En dit is hier waar wysheid inkom. Wysheid is om te weet dat jy die Here moet dien (vers 10).

Dat jy die Here met jou hele lewe moet vertrou en Hom volg waar Hy jou ook al heen lei. Wysheid is om te weet dat jy leef met die volle beheer oor jou lewe in God se hande.

Kom ons verander die invalshoek. Kennis is wat jy in die katkisasie geleer het oor oa die nagmaal. Kennis is om die betekenisse van die nagmaal te kan uitspel. Wysheid is om bewus te wees dat Christus self in die tekens teenwoordig is. Wysheid is om te weet iets groters gebeur vanoggend hier as net brood en wyn wat genuttig word.

Psalm 111 gaan oor die kultus. Die Ou Testamentiese erediens. Dit was die plek waar God gekies het om Sy mense te ontmoet. Maar net soos met die erediens het mense die hart van die diens verloor. Hulle het nog al die regte dinge gedoen maar die innerlike lus, die vuur en passie en die vreugde was weg.

Hulle het die Here nie meer met die hele hart geloof nie. Hulle het nog meegedoen maar nie meer gaan dink oor wat hulle doen nie (2a). Dit het hulle skynbaar ook nie gepla dat hulle nie als verstaan nie.

En 'n mens word so omdat ons so maklik vergeet wat die Here in ons lewens doen. Psalm 111 wou oa die volk herhinner en weer laat nuut dink aan wat die Here doen.

Vanoggend is dan 'n stuk herhinnering aan Wie die Here is.

Vers 4 sê God self maak seker dat Sy magtige dade nie vergeet word nie. Jesus het die nagmaal ingestel as teken om ons te herhinner aan Hom en Sy liefde vir ons (interpretasie van 1 Kor 11:23 - 26)

Die brood en wyn roep uit: Jesus het Sy lewe aan die kruis opgeoffer om jou te red van God se woede en oordeel. Die tafel is “oorlaai” met bewyse van God se genade. En dis net vir jou!

En dan ... in hierdie wonderlike maar deurmekaar en onseker land van ons word jy nou weer herhinner dat die Here wat jou so lief het dat Hy in jou plek gaan sterf het, ... is die Here wat vandag nog getrou is. Hy gaan nie more terug krabbel op Sy woord nie.

Hy gaan nie sê Hy is verkeerd aangehaal nie. Hy hou Sy ooreenkoms met jou. Ja, die een wat Hy by die doop met jou gesluit het ... ja al was jy te klein om te weet ... Hy weet en Hy hou vandag nog Sy kant van daardie ooreenkoms presies soos Hy onderneem het om dit te doen.

Hoor vandag dat die Here die mense voed wat Hom dien (vers 5). En ons bekommer ons oor more? Moenie. God voorsien. Die volk van daardie tyd word terug gevat na hoe God die mense uit Egipte gered het; hoe Hy hulle kos gegee het in die woestyn ... en vir hulle 'n land van hulle eie gegee het. En hulle word herhinner aan Sinai waar God Sy wet en gebooie vir hulle gegee het.

Wat ons moet hoor is dat God se gebooie ... dit wat Hy van ons vra selfs vandag nog ... is gegee met die beste bedoelings. Dit is gegee in trou en regverdigheid. Dit word onderskryf deur God se eie trou. Ons kan terug gaan en gaan kyk hoe God self met mag in ons lewens gewerk het en hoe Hy ons gehelp en gedra het.

Die psalm roep hard: gaan dink na! Gaan sien raak wat God doen. Meer nog: Gaan dink oor Wie God is en hoe God maak. Wat jy sal agterkom, opnuut ontdek of raaksien is dat God getrou is en nie onredelik in wat Hy van ons vra nie.

Jy gaan ontdek dat Hy (Sy Naam in vers 9) heilig is ... sonder sonde of blaam of enigiets negatiefs. Dit wek ontsag.

As jy hier dink aan van die profete soos Jesaja wat voor God se troon beland het en die effek wat God op Jesaja en later op Johannes en ander gehad het ... dan sal ook ons met baie groter respek en eerbied met God saam leef.

Eintlik hoef jy net te kyk wat God gedoen het. Kyk na die natuur ... na mense ... na wat God doen. Kan jy dit doen? Kan jy iets skep? Kan jy dit so instandhou? Ons verniel als, ons laat spesies uitsterf en vernietig die osoon laag.

Kan ons doen wat God doen? Nee. Die Psalmdigter is reg: Wat God doen is groot, vol majesteit en luister (vers 3). Laat ons God weer die eerbied en respek gee wat Hom toe kom. En laat ons Hom die ereplek, die Koningstroon en Direkteurskap van ons lewens gee.

Kom ons leef voor God dit wat Hy vir ons die voorbeeld gee. Kom ons leef liefde en trou teenoor Hom. Dit sal wysheid wees. Kom ons leef weer Sy gebooie asof dit ons hart se grootste begeerte is.

Gaan dink daaroor.

Vir oulaas, kom ons kyk net weer na wat Psalm 111 sê God alles doen:

ñ  God sorg dat Sy magtige dade nie vergeet word nie (vers 4)

ñ  God voed die wat Hom dien (vers 5).

ñ  God hou Sy verbond in stand (vers 5)

ñ  God laat ons die krag van dit wat Hy doen ervaar (vers 6)

ñ  God het aan Sy volk 'n land gegee (vers 6)

ñ  God het vryheid vir Sy volk gegee (vers 9)

Sy Naam is heilig, dit wek ontsag!!

Het jy wysheid? Of is jou geloof meer op die vlak van kennis van God? Jou antwoord word gesien in hoe jy leef?